Lo web independent, son milierats de sitis que ofrisson qualques milions de paginas prestidas de passion, d’opinion, d’informacion, confeccionadas per d’utilisaires conscients del seu ròtle de ciutadans. Lo web independent, es un ligam novèl entre los individús, una banca de saber gratuita, ofrida, dobèrta, sens pretensions.
Fàcia als sitis comercials dels messatges publicitaris agressius, destinats a fichar e enfocar als utilisaires, lo web independent propausa una vision respectuosa dels individús e de las suas libertats, incita a la reflexion e al dialòg. Mentres que los sitis d’entrepresas se convertisson en revistas d’informacion e de divertiment, mentres que los mastodontes de l’informacion-espectacle, de las telecomunicacions, de l’informatica e del armament invasisson lo malhum, lo web independent propausa una vision liura del monde, permet d’esquivar la censura economica de l’informacion, la sua confusion amb la publicitat e lo publi-reportatge, la sua reduccion a un espectacle encalucador e manipulator.
Pasmens, lo web independent e contributiu es ara amenaçat; per la fugida en abans de la tecnologia que fa cada jorn mai complèxa e mai cara la creacion d’un siti; per la poténcia publicitària espotissenta del web mercantil; e dins pas gaire pels accesses disimetrics, los Network Computers, los malhums privats, lo broadcasting, que lo seu objetiu es de redusir al ciutadan a l’unic ròtle de consumidor. La premsa especialisada, tant avida de las publicitats d’anonciaires que recupèran en benefici pròpi la riquesa espantaira del web contributiu, e fascinada per las potencialitats tecnicas e comercialas d’Internet, dedica sonque qualques linhas estequidas als sitis independents, occulta la dimension culturala del malhum, despacha rapidament la mòrt de sitis precursors del web artesanal, e al contrari comenta sens moderacion lo siti nòu de qualque entrepresa comerciala. La creacion d’un siti personal es presentada als utilisaires d’Internet coma una motivacion plan marginala fàcia a las possibilitats d’utilisacion en linha de la sua carta de credit.
Convidam alavetz als utilisaires a prene consciéncia dels seus ròtles primordials sus Internet: quand installan lo seu siti, mandan de comentaris, de criticas e de paraula d’encoratjament als webmasters, quand s’ajudan mutualament dins los nhosgrops e per corrièr electronic, propausan una informacion liura e gratuita que d’autres voldrián vendre e controllar. La pedagogia, l’informacion, la cultura e lo debat son lo patrimòni dels utilisaires, dels webmasters independents e de las iniciativas universitàrias e associativas.
